ՊԵԿ նախագահը հյուրընկալել է Իրանի դեսպանին

Հայաստանի Հանրապետության պետական եկամուտների նախագահ Ռուստամ Բադասյանը հյուրընկալել է Իրանի Իսլամական Հանրապետության նորանշանակ արտակարգ և լիազոր դեսպան Մեհդի Սոբհանիին: Այդ մասին տեղեկանում ենք Ռուստամ Բադասյանի՝ «Ֆեյսբուք»-ի էջում կատարած գրառումից:

«Օրերս հյուրընկալել եմ Հայաստանի Հանրապետությունում Իրանի Իսլամական Հանրապետության նորանշանակ արտակարգ և լիազոր դեսպան Մեհդի Սոբհանիին։

Ողջունելով նորանշանակ դեսպանին պաշտոնի ստանձնման կապակցությամբ՝ կարևորել եմ հայ-իրանական երկկողմ հարաբերությունների զարգացման անհրաժեշտությունը, հատկապես, երկու երկրների մաքսային և հարկային մարմինների միջև։

Դեսպան Մեհդի Սոբհանին ընդգծել է մաքսային ծառայության արդյունավետ աշխատանքի ավանդը՝ երկու երկրների միջև արձանագրված առևտրաշրջանառության աճի համատեքստում:

Անդրադարձել ենք ճանապարհային տուրքերի, ՄՃՓ գրքույկի կիրառմամբ բեռների միջազգային փոխադրման հարցերին, ինչպես նաև տվյալների էլեկտրոնային փոխանակման անհրաժեշտությանը և այդ ուղղությամբ իրականացվող աշխատանքներին։

Հանդիպման ավարտին երկուստեք պատրաստակամություն ենք հայտնել՝ առկա բոլոր ուղղություններով գոհացնող արդյունքների հասնելու վերաբերյալ»,- նշված է գրառման մեջ: