Ֆրանսիայի Ազգային ժողովի արտաքին հարաբերությունների հանձնաժողովի նախագահ Ժան-Լուի Բուրլանժի գլխավորած պատվիրակությունը սեպտեմբերի 14-ին այցելել է Հայոց ցեղասպանության հուշահամալիր՝ ՀՀ ԱԺ արտաքին հարաբերությունների հանձնաժողովի նախագահ Սարգիս Խանդանյանի և ՀՀ-ում Ֆրանսիայի արտակարգ և լիազոր դեսպան Օլիվիե Դըկոտինյիի ուղեկցությամբ:
![4as.jpg (604 KB)](https://armenpress.am/static/add/011/Econom/gyumri/Aznavour/qolej/honor/mshakuyt/honor/sarq/samsung/4as.jpg)
Ինչպես «Արմենպրես»-ը տեղեկանում է Հայոց ցեղասպանության-ինստիտուտի տարածած հաղորդագրությունից, հյուրերին դիմավորել և հուշահամալիրի ստեղծման պատմությունն է ներկայացրել թանգարանային աշխատանքների գծով փոխտնօրեն Լուսինե Աբրահամյանը: Նա անդրադարձ է կատարել նաև անցյալ դարավերջին Ադրբեջանի Սումգայիթ, Կիրովաբադ (Գանձակ), Բաքու քաղաքներում ադրբեջանական կառավարության կազմակերպած կոտորածներին զոհ գնացած հայերի հիշատակին Ծիծեռնակաբերդի տարածքում տեղադրված երեք խաչքարերի և Արցախյան գոյամարտի տարիներին Հուշապատի դիմացի հատվածում հուղարկավորված հինգ ազատամարտիկների պատմություններին՝ շեշտելով կապը տեղի ունեցածի և Հայոց ցեղասպանության միջև:
![3as.jpg (605 KB)](https://armenpress.am/static/add/011/Econom/gyumri/Aznavour/qolej/honor/mshakuyt/honor/sarq/samsung/3as.jpg)
Ժան-Լուի Բուրլանժը ծաղկեպսակ է դրել Հայոց ցեղասպանության զոհերի հիշատակը հավերժացնող հուշակոթողին, որից հետո հյուրերը ծաղիկներ են դրել անմար կրակի մոտ և մեկ րոպե լռությամբ հարգել Հայոց ցեղասպանության անմեղ զոհերի հիշատակը:
![2as.jpg (606 KB)](https://armenpress.am/static/add/011/Econom/gyumri/Aznavour/qolej/honor/mshakuyt/honor/sarq/samsung/2as.jpg)
Հյուրերը շրջել են Հայոց ցեղասպանության թանգարանում, որտեղ ՀՑԹԻ ավագ էքսկուրսավար Հասմիկ Մարտիրոսյանի ուղեկցությամբ ծանոթացել են մշտական և ժամանակավոր ցուցադրություններին, որից հետո պարոն Ժան-Լուի Բուրլանժը գրառում է կատարեց Պատվավոր հյուրերի հուշամատյանում:
![5as.jpg (476 KB)](https://armenpress.am/static/add/011/Econom/gyumri/Aznavour/qolej/honor/mshakuyt/honor/sarq/samsung/5as.jpg)
Շնորհակալություն հայտնելով այցի համար՝ ՀՑԹԻ թանգարանային աշխատանքների գծով փոխտնօրեն Լուսինե Աբրահամյանը պատվավոր հյուրին է նվիրել Հայոց ցեղասպանության մասին գրքեր: