Հյուսիսային մաքսատանը մեքենաներից գողություն կատարած երիտասարդները հայտնաբերվել են

Ոստիկանության Կումայրիի բաժնում օպերատիվ տեղեկություններ են ստացվել, որ գյումրեցի երկու տղամարդ տարբեր ժամանակահատվածներում Հյուսիսային մաքսատան տարածքում կայանված մի շարք մեքենաներից գողացել են պահեստամասեր:

Ինչպես տեղեկացրին ՀՀ ներքին գործերի նախարարության ոստիկանությունից, հոկտեմբերի 18-ին, իրացնելով օպերատիվ տվյալները, Կումայրիի բաժնի ոստիկանները Գյումրի քաղաքի Մյասնիկյան փողոցում հայտնաբերել, ձերբակալել և բաժին են տեղափոխել 30-ամյա և 29-ամյա երկու երիտասարդների, որոնք խոստովանել են, որ գարնանից մինչև սեպտեմբերի 30-ն ընկած ժամանակահատվածում մաքսատան տարածքում կայանված մի շարք մեքենաներից գողացել են պահեստամասեր, որոնց մի մասը 30-ամյա երիտասարդի տանն է:

Ըստ աղբյուրի՝ գյումրեցի երիտասարդները և կազմված փաստաթղթերը ներկայացվել են Շիրակի մարզային քննչական վարչություն, որտեղ նախաձեռնվել է քրեական վարույթ:

Նշվում է, որ նույն օրը ոստիկանության Կումայրիի բաժին է հրավիրվել տուժողներից մեկը: Նա հաղորդում է տվել, որ օգոստոսի 19-ից հոկտեմբերի 17-ն ընկած ժամանակահատվածում գողացել են մաքսատան տարածքում կայանված իր «Դոջ Չելենջեր» մակնիշի մեքենայի երկու լուսարձակները և թափարգելը՝ պատճառելով 2000 դոլարի նյութական վնաս: Գողոնը մասամբ առգրավվել է:

Կատարվում է նախաքննություն:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: