Հիմնանորոգումից հետո վերաբացվել է Գավառի գեղարվեստի դպրոցը

Նոր ուսումնական տարում Գավառում իր գործունեությունը կծավալի գեղարվեստի դպրոցը, որտեղ աշխատանքները ժամանակավորապես դադարեցվել էին 2021 թվականից՝ հիմնանորոգման աշխատանքների իրականացման պատճառով։

Ինչպես տեղեկացրին Գավառի համայնքապետարանի աշխատակազմից, գեղարվեստի դպրոցի բացման արարողությանը մասնակցել է Գավառ համայնքի ղեկավար Գուրգեն Մարտիրոսյանը համայնքի ղեկավարի տեղակալները և աշխատակազմի աշխատակիցներ, ավագանու անդամներ,  Երևանի Փանոս Թերլեմեզյանի անվան գեղարվեստի պետական ուսումնարանի դասախոս, «Մշակութային կրթության աջակցության հիմնադրամ»-ի կերպարվեստի բաժնի մասնագետ, արտադպրոցական ուսումնական հաստատության մանկավարժների մեթոդական և ծրագրային գրականության հեղինակ Դավիթ Դավթյանը, ՀՀ ժողովրդական վարպետ Լալա Մնեյանը։

Գավառի գեղարվեստի դպրոցը  կերպարվեստի մասնագիտացված հաստատություն  է` հագեցած մասնագիտական գույքով, տեխնիկայով, ակադեմիական նկարչական նյութերով։ Դպրոցում գործելու են գեղանկարչության, ձեռարվեստի և խեցեգործության բաժիններ։

Գավառի Զորավար Անդրանիկի-18 հասցեում գտնվող նախկին գեղարվեստի դպրոցի շենքը հիմնանորոգվել է ամբողջությամբ՝ ՀՀ կառավարության կողմից 2021 թվականին իրականացվող սուբվենցիոն ծրագրերի շրջանակներում։ Ծրագրի ընդհանուր արժեքը կազմել է 47 միլիոն 258 հազար դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Գավառի համայնքապետարանը։

Գավառ համայնքի 2023 թվականի բյուջեից ընթացիկ դրամաշնորհով դպրոցին հատկացվել է 2 , իսկ կապիտալ դրամաշնորհով՝ 5 միլիոն դրամ։

Միջոցներն օգտագործվել են գույքի և աշխատանքային անհրաժեշտ պարագաների ձեռքբերման համար»,-ներկայացրին Գավառի համայնքապետարանի աշխատակազմից։