Բլինքենն Ալիևին հայտել է Լաչինի միջանցքով ազատ տարանցման հրատապ անհրաժեշտության մասին

ԱՄՆ պետքարտուղար Էնթոնի Բլինքենն Ադրբեջանի նախագահ Իլհամ Ալիևի հետ հեռախոսազրույցի ընթացքում ընդգծել է Լաչինի միջանցքով ազատ տեղաշարժի հրատապ անհրաժեշտությունը, ինչպես նաև քննարկել հումանիտար մատակարարումների այլընտրանքային ուղիները։ Այս մասին հաղորդում է «Արմենպրես»-ը՝ վկայակոչելով ԱՄՆ պետքարտուղարության մամուլի ծառայության հուլիսի 30-ի հաղորդագրությունը։

«Պետքարտուղար Էնթոնի Ջ. Բլինքենը երեկ զրուցել է Ադրբեջանի նախագահ Իլհամ Ալիևի հետ՝ խորը մտահոգություն հայտնելով Լեռնային Ղարաբաղում հումանիտար իրավիճակի առնչությամբ։ Պետքարտուղար Բլինքենը շեշտել է Լաչինի միջանցքով առևտրային, հումանիտար և մասնավոր մեքենաների ազատ տարանցման հրատապ անհրաժեշտությունը և ընդգծել փոխզիջման անհրաժեշտությունը այլընտրանքային ուղիների հարցում, որպեսզի մարդասիրական մատակարարումները հասնեն Լեռնային Ղարաբաղի բնակչությանը», – նշված է հաղորդագրությունում։

Պետքարտուղարը նաև ընդգծել է, որ բոլոր կողմերը պետք է պահպանեն խաղաղ բանակցությունների հարցում դրական առաջընթացը։

Ալիևի հետ հեռախոսազրույցի մասին Twitter-ի իր էջում առանձին գրառում է կատարել նաև պետքարտուղար Բլինքենը։

«Երեկ խոսեցի Ադրբեջանի նախագահ Ալիևի հետ՝ Լեռնային Ղարաբաղում վատթարացող մարդասիրական պայմանների առնչությամբ մեր խորը մտահոգությունը հայտնելու համար։ Միացյալ Նահանգները կոչ է անում բոլոր կողմերին շարունակել երկխոսությունը՝ կայուն խաղաղության համաձայնագրի հասնելու համար», – գրել է ԱՄՆ պետքարտուղարը։

I spoke to Azerbaijani President Aliyev yesterday to express our deep concern for the deteriorating humanitarian conditions in Nagorno-Karabakh. The United States urges all sides to continue dialogue to reach a durable peace agreement.

— Secretary Antony Blinken (@SecBlinken) July 30, 2023