Հնդկաստանի բնակչությունը հասել է 1,3 միլիարդի՝ անկախ ՄԱԿ-ի կանխատեսումներից

Հնդկաստանի բնակչության թվաքանակը հուլիսի 1-ի դրությամբ, կառավարության մոտավոր գնահատմամբ, կազմել է 1,392 միլիարդ: Փաստորեն, չի իրականացել այն կանխատեսումը, որ հուլիսին Հնդկաստանի բնակչության թիվը կգերազանցի Չինաստանի բնակչության թիվը։ Այդ մասին հայտարարել է Հնդկաստանի ներքին գործերի պետական նախարար Նիտյանանդ Ռայը։

«Այսպիսով, 1,392 միլիարդ թվաքանակը ոչ միայն ցածր է Հնդկաստանի համար ՄԱԿ-ի Տնտեսական և սոցիալական հարցերով վարչության բնակչության հիմնադրամի` հուլիսի համար կանխատեսումից (խմբ․՝ 1,429 միլիարդ), այլև ավելի ցածր Չինաստանի համար կանխատեսված մակարդակից՝ 1,426 միլիարդից», – նախարարի խոսքն է մեջբերում Times of India թերթը։

Ըստ ՄԱԿ-ի կանխատեսումների՝ Հնդկաստանի բնակչությունը պետք է հավասարվեր Չինաստանի բնակչությանը 2023 թվականի ապրիլին (երբ Չինաստանի բնակիչների թիվը պետք է կազմեր 1 425 775 850)  և պետք է գերազանցեր այն այս տարվա հուլիսի 1-ին։

ՄԱԿ-ը կանխատեսել էր, որ Չինաստանի բնակչությունն առավելակետին՝ 1,426 միլիարդի է հասել 2022 թվականին և սկսել է նվազել։ Ըստ կանխատեսումների՝ դարավերջին Չինաստանի բնակչությունը կարող է նվազել 1 միլիարդից:

Փաստորեն, Հնդկաստանը բնակչության թվով աշխարհում երկրորդ երկիրն է՝ զիջելով Չինաստանին։ Worldometer կայքի համաձայն՝ երրորդ տեղում ԱՄՆ-ն է՝ ավելի քան 330 միլիարդ բնակչությամբ։ Ի դեպ, Հայաստանը նշված սանդղակում զբաղեցնում է 140-րդ հորիզոնականը։