Armhanq.com ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅԱՆ
Սաուդյան Արաբիայի էներգետիկայի նախարարը պաշտպանել է թագավորության որոշումը՝ երկարաձգելու նավթի արդյունահանման կրճատումները՝ նշելով, որ այդ քայլը չի եղել գները բարձրացնելու փորձ։ Այս մասին հաղորդում է Financial Times պարբերականը։
Էր Ռիադը և Մոսկվան այս ամսվա սկզբին հայտարարել էին, որ նավթարդյունահանման և արտահանման ծավալների կրճատումը կպահպանեն մինչև 2023 թ․վերջը։ Այդ հայտարարությունից հետո Brent նավթի գինն աճել է ավելի քան 6 %-ով՝ հասնելով մեկ բարելի դիմաց գրեթե 95 ԱՄՆ դոլարի, ինչը ռեկորդային է այս տարվա համար։
«Խոսքը ոչ թե գների բարձրացման, այլ որոշումների ընդունման մասին է, որոնք ճիշտ են` ելնելով առկա տվյալներից»,– հայտարարել է Սաուդյան Արաբիայի էներգետիկայի նախարար արքայազն Աբդուլազիզ բեն Սալմանը Կանադայի Կալգարի քաղաքում կայացած Նավթի համաշխարհային կոնգրեսում:
Նախարարն առաջվա պես ակնհայտ չի համարում համաշխարհային տնտեսության վերականգնումը, որը զարկ է տվել նավթի պահանջարկի աճի։
«Հարցն առաջվա պես այն է, թե ինչ տեղի կունենա Եվրոպայում աճի առումով: Հարցը նաև այն է, թե ինչ են անելու կենտրոնական բանկերը տոկոսադրույքների հետ և ինչպես իրեն կզգա ամերիկյան տնտեսությունն այն համատեքստում, ինչ տեղի է ունենում աշխարհում», – շարունակել է արքայազնը:
Նա նաև նշել է, որ վստահություն չկա Չինաստանում տիրող իրադրության նկատմամբ։
Աբդուլազիզ բեն Սալմանը նշել է, որ Սաուդյան Արաբիան կարող է անհրաժեշտության դեպքում արդյունահանման ծավալը կանոնավորել, սակայն «պետք է զգույշ լինել նման հարցերում»։
Ըստ Էներգետիկայի միջազգային գործակալության՝ նավթի արդյունահանման կրճատումների պատճառով տարվա մնացած ամիսներին նավթի համաշխարհային շուկաները «զգալի դեֆիցիտ» կունենան։
