Armhanq.com ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅԱՆ
Իտալական Ferrari-ն ԱՄՆ-ում ներգրավել է թվային ակտիվները որպես վճարման եղանակ: Գործառույթը Եվրոպայում կհայտնվի 2024թ․ առաջին եռամսյակում, գրում է Reuters-ը։
Ferrari-ի կոմերցիոն և մարքեթինգ տնօրեն Էնրիկո Գալիերայի խոսքով՝ որոշումն ընդունվել է ի պատասխան դիլերների և հաճախորդների խնդրանքներին, որոնցից շատերը կրիպտոարժույթներ են օգտագործում:
«Նրանցից ոմանք երիտասարդ ներդրողներ են, ովքեր իրենց կարողությունը կառուցել են թվային ակտիվների վրա: Մյուսները ավելի ավանդական ներդրողներ են, ովքեր ձգտում են դիվերսիֆիկացնել իրենց պորտֆելները», – նշել է նա:
Ferrari-ն համագործակցության մեջ է մտել BitPay պրոցեսինգային ծառայության հետ, որը ստացված ակտիվները կվերափոխի ազգային արժույթների։ Սկզբնական փուլում ընկերությունն կընդունի Bitcoin, Ethereum և USDC սթեյբլքոյն:
«Սա կօգնի մեզ հասնել այն մարդկանց, ովքեր անպայմանորեն մեր հաճախորդները չեն, բայց կարող են իրենց թույլ տալ Ferrari: Գները չեն փոխվի, չեն լինի նաև միջնորդավճարներ կամ հավելավճարներ կրիպտոարժույթներով վճարելիս», – նշել է Գալիերան:
2023թ. առաջին կիսամյակում Ferrari-ն ավելի քան 1800 ավտոմեքենա է մատակարարել Հյուսիսային Ամերիկային: Ընկերությունը չի հստակեցրել, թե քանի մեքենա են նախատեսում վաճառել կրիպտոարժույթով։
