Armhanq.com ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅԱՆ
Բրյուսելում մայիսի 29-ին մեկնարկել է Շումանի անվտանգության և պաշտպանության ֆորումը։
Ֆորումին մասնակցել է նաև Հայաստանի պաշտպանության նախարար Սուրեն Պապիկյանը, որն աշխատանքային այցով Բրյուսել էր այցելել մայիսի 28-ին։
Բրյուսելում Պաշտպանության նախարար Սուրեն Պապիկյանը կարևորեց նմանատիպ լայնամասշտաբ ֆորումին Հայաստանի մասնակցությունը՝ հաշվի առնելով Հայաստանի առաջ ծառացած մարտահրավերները։
«Մեր հարաբերություններն այսօր ԵՄ-ի հետ և այն հանգամանքը, որ մեր անվտանգային ակնկալիքները նաև ԵՄ-ի աջակցությամբ են ապահովվելու, մեզ համար օրակարգային են դարձնում նման մասնակցությունները», – նշեց նախարարը։
Ֆորումին մասնակցում են քաղաքական դերակատարներ, բարձրաստիճան պաշտոնյաներ, ռազմական ներկայացուցիչներ ԵՄ անդամ երկրներից և ավելի քան 60 գործընկեր երկրներից, ինչպես նաև միջազգային և տարածաշրջանային կազմակերպությունների, առաջատար ուղեղային կենտրոնների և ակադեմիաների ներկայացուցիչներ։
Ֆորումի նախաձեռնության հեղինակ, ԵՄ արտաքին հարաբերությունների, անվտանգության ու պաշտպանության հարցերով բարձր ներկայացուցիչ Ժոզեպ Բորելն իր բացման խոսքը սկսեց նրանով, որ այսօր առավել քան երբեք, անվտանգությունն ու պաշտպանությունը կարևոր են։ Բորելի խոսքով՝ ֆորումի նպատակն է կենտրոնանալ երեք հիմնական հարցի վրա՝ որո՞նք են ընդհանուր սպառնալիքները, ինչպե՞ս է ԵՄ-ն փորձում ադապտացնել իր գործողությունները դրանց առերեսվելու համար և ինչպե՞ս կարելի է համագործակցել՝ որպես գործընկերներ։
«Եվրոպական միությունը ստեղծվել է եվրոպացիների համար խաղաղություն կառուցելու նպատակով։ Բայց, ցավոք, խաղաղությունը նորմալ իրավիճակ չէ այսօր, և մենք պետք է շատ արագ անվտանգություն ապահովող դերակատար դառնանք։ Մենք ունենք շատ մեծ բացեր, բայց անում ենք ամեն ինչ, որպեսզի մեր ռազմական արդյունաբերությունը մեծացնենք եւ նվազեցնենք մեր կախվածությունն այս ոլորտում», – ասաց ԵՄ բարձր ներկայացուցիչը՝ հավելելով, որ բանակը յուրաքանչյուր երկրի ինքնիշխանության կարևոր տարրն է, և ԵՄ պաշտպանությունն անդամ երկրների իրավասությունն է․ դրա համար էլ համատեղ պաշտպանական համակարգը կենսական նշանակություն ունի, որպեսզի չվտանգվի երկրների ինքնիշխանությունը և միևնույն ժամանակ ապահովվի ԵՄ ընդհանուր անվտանգությունը։
Ընդհանուր անվտանգության մարտահրավերների և դրանց պատասխանների շուրջ մտքեր փոխանակելու նպատակով անցկացվող ֆորումի ընթացքում մասնակիցները լիագումար նիստերի, կլոր-սեղան քննարկումների միջոցով ուսումնասիրում են, թե ինչպես լավագույնս ամրապնդել և զարգացնել համագործակցությունը խաղաղության, անվտանգության և պաշտպանության ոլորտում՝ նպատակ ունենալով դիմակայել անվտանգության ընդհանուր սպառնալիքներին, ինչպես նաև պահպանել միջազգային կանոնների վրա հիմնված կարգը և բազմակողմանիությունը:
«Մեկ հարթակ գործընկերություն անվտանգության շարունակականության մեջ» խորագրի ներքո առաջին լիագումար նիստում քննարկվող հիմնական հարցերի շարքում է, թե առկա սպառնալիքների եւ անվտանգության միջավայրի պայմաններում ինչպե՞ս պետք է վերագնահատվի անվտանգության և պաշտպանության ռազմավարությունն ու քաղաքականությունը, և թե ինչպես ուժեղացնել գործընկերությունները։
Ֆորումի երկրորդ՝ «Կայուն խաղաղության ճարտարապետություն․ բազմակողմանիություն և գործընկերություն» խորագիրը կրող լիագումար նիստի ուշադրության կենտրոնում է բազմակողմանիությունը որպես կայուն խաղաղության հիմնական շրջանակ:
