Ջերմուկի ճոպանուղին կվերանորոգվի

Վայոց ձորի մարզի Ջերմուկ համայնքում 2022 թ. սեպտեմբերին ադրբեջանական ռազմական գործողություններից տուժած Ջերմուկ համայնքի ճոպանուղու վնասված ճոպանի փոխարինման միջոցով կապահովվի Ջերմուկ համայնքի բնակիչների, զբոսաշրջիկների և լեռնադահուկային սպորտի սիրահարների հանգստի համար անվտանգ և բարեկեցիկ պայմաններ, կվերականգնվի համայնքի ենթակառուցվածքի անխափան գործունեությունը՝ նպաստավոր նախադրյալներ ստեղծելով համայնքում զբոսաշրջության հետագա զարգացման համար, խթանելով զբոսաշրջիկների ներհոսքը դեպի համայնք։

Ըստ այդմ՝  26,856,400 դրամ դրամաշնորհ կտրամադրվի Վայոց ձորի մարզպետի աշխատակազմ՝ Ջերմուկի համայնքապետարանի ճոպանուղու ճոպանի փոխարինման ծախսերի փոխհատուցման նպատակով։ Միջոցառման արդյունքում կիրականացվի  գլխավոր 2 կմ երկարությամբ ճոպանի ձեռք բերում, որը կազմում է ճոպանուղու մեկ պտույտը, տեղափոխում, փոխում և հիմնանորոգում, նախկին վնասված ճոպանի ապամոնտաժում, նոր ճոպանի մոնտաժում, համապատասխան դետալների և սարքավորումների փոխարինում՝  անվտանգ ուղևորափոխադրման նորմերին ու ստանդարտներին համապատասխան, մասնագիտական ծառայությունների մատուցում և այլն:

Հիմնավորման համաձայն՝ ճոպանուղին կառուցվել է 2007 թվականին իտալական «Leitner» կազմակերպության կողմից։ Այն քաղաքի հյուրերի և զբոսաշրջիկների՝ հատկապես լեռնադահուկային սպորտի սիրահարների հիմնական այցելավայրերից մեկն է, ունի 2 սահուղի՝ 1450  և 1550 մետր երկարություններով։ Ճոպանուղին սպասարկում էր տարեկան շուրջ 25000-30000 այցելու՝ համայնքի բյուջե ապահովելով լրացուցիչ ֆինանսական մուտքեր։ Ճոպանուղին ներկայումս չի գործում և անձնակազմի մի մասը գտնվում է հարկադրված պարապուրդում և վճարվում է մասամբ: