ԴԱՀԿ պատվիրակությունը եռօրյա այցով մեկնել է ՌԴ

Գլխավոր հարկադիր կատարող Արսեն Մնացականյանի գլխավորած պատվիրակությունը Ռուսաստանի Դաշնության դատական կարգադրիչների դաշնային ծառայության տնօրեն, գլխավոր հարկադիր կատարող Դմիտրի Արիստովի հրավերով օգոստոսի 27-ին եռօրյա պաշտոնական այցով մեկնել է Ռուսաստանի Դաշնություն։ Ինչպես տեղեկացրին Հարկադիր կատարումն ապահովող ծառայությունից, պատվիրակության կազմում են Գլխավոր հարկադիր կատարողի տեղակալ Վահե Մովսիսյանը, գլխավոր քարտուղար Աշոտ Ավագյանը, Իրավաբանական բաժնի պետ Գոհար Մկրտչյանը։

Մոսկվայում Արսեն Մնացականյանը և Դմիտրի Արիստովը քննարկել են երկու երկրների գործընկեր կառույցների միջև ակտիվ համագործակցությանն առնչվող հարցեր։

Հանդիպման ընթացքում գլխավոր հարկադիր կատարողը մասնավորպես խոսել է ՀՀ արդարադատության նախարարության հարկադիր կատարումն ապահովող ծառայության և ՌԴ դատական կարգադրիչների դաշնային ծառայության միջև ստորագրված համագործակցության հուշագրի իրականացման նպատակով անցած տարի Հայաստանի և Ռուսաստանի արդարադատության նախարարների կողմից ստորագրված 2022-2023թթ․ համագործակցության ծրագրի մասին՝ նշելով, որ այն լավ առիթ է երկու կառույցների միջև հետագա փոխգործակցության, այդ թվում՝ երկկողմանի այցերի, հարկադիր կատարման ոլորտում փորձի փոխանակման, հարկադիր կատարումն ապահովող մարմինների աշխատանքում նոր թվային տեխնոլոգիաների ներդրման, տեղեկատվության փոխանակման և այլ ուղղություններով հետագա համագործակցության ամրապնդման համար։

Արսեն Մնացականյանը ռուս գործընկերներին է ներկայացրել նաև Հայաստանի Հանրապետության Կառավարության կողմից 2022-2026թթ․ դատաիրավական բարեփոխումների ռազմավարությամբ հարկադիր կատարման ոլորտի համընդհանուր բարեփոխման գործընթացի հիմնական ուղղությունները, որոնք միտված են կատարողական գործողությունների արդյունավետության բարձրացմանը, կատարողական վարույթի մասնակիցների օրինական շահերի պաշտպանության ապահովմանը, նրանց խնդիրներին ու կարիքներին արագ և արդյունավետ արձագանքելու կառուցակարգերի ներդրմանը:

Գլխավոր հարկադիր կատարողը անդրադարձել է հարկադիր կատարման ոլորտում առաջարկվող օրենսդրական փոփոխություններով նախատեսվող նոր իրավակարգավորումներին, ինչպես նաև կատարողական վարույթի թվայնացման և էլեկտրոնային համակարգերի հետագա կատարելագործման հարցերին։

Երկկողմ հանդիպման ընթացքում քննարկվել են երեխայի տեսակցության և հանձնման վերաբերյալ կատարողական վարույթների կատարման առանձնահատկություններին, առաջացող խնդիրների հաղթահարման ուղղություններին, ինչպես նաև քաղաքացիների սպասարկման, թեժ գծի աշխատանքի կազմակերպման հարցերին։

Ըստ օրակարգի՝ Ռուսաստանի Դաշնություն կատարած եռօրյա այցի ընթացքում ՀԿԱԾ պատվիրակությունը այցելել է նաև ՌԴ դատական կարգադրիների Կալինինգրադի մարզի Սվետլոգորսկի քաղաքային շրջանի բաժանմունք, ծանոթացել տարածքային ստորաբաժանման գործունեությանը։

Այցի ավարտին կողմերը վերահաստատել են իրենց պատրաստակամությունը ամրապնդելու և զարգացնելու կառույցների միջև հետագա համագործակցությունը։