Հայաստանի հանքագործների և մետալուրգների միության անդամ 11 ընկերություն ներառված է ՀՀ 1000 խոշոր հարկ վճարողների ցանկում

ՊԵԿ-ը հրապարակել է ՀՀ-ում տնտեսական գործունություն իրականացող՝ 2023 թ․-ի առաջին կիսամյակի 1000 խոշոր հարկ վճարողների ցանկը։ Հայաստանի հանքագործների և մետալուրգների միության 11 ընկերություն ընդգրկվել է այդ աղյուսակում։

Պետությանը  վճարած հարկերի մեծությամբ աղուսյակը գլխավորում է Զանգեզուրի պղնձամոլիբդենային կոմբինատը՝ նախորդ եռամսյակի համեմատ մեկ հորիզոնականով բարելավելով իր դիրքերը։ Ընկերությունն առաջին կիսամյակում պետությանը վճարել է 34 մլդ 795 մլն 243 հազար դրամ։  

«Ասկե գրուպ» ընկերությունը նույնպես բարելավել է իր ցուցանիշը՝ 63-րդ տեղից  բարձրանալով 54-րդ հորիզոնական։

«Ցեպելին Արմենիա» ընկերությունն այս տարվա առաջին կիսամյակի հարկ վճարողների ցանկի առաջատարներից է, սակայն այժմ 11 հորիզոնականով իր տեղը զիջել է՝ զբաղեցնելով  83 տեղը։

Հարկ վճարողների թոփ 100-ը եզրափակում է «Թեղուտ» ընկերությունը․ պետությանը վճարել է 1մլդ 560 մլն 352  հազար դրամ հարկ։

«Գեոպրոմայնինգ», «Իկօ Մաշիների» ընկերությունները 92 և 118 տեղերից, համապատասխանաբար, նահանջել են 120 և 137 հորիզոնականներ։

Զգալի առաջընթաց է գրանցել միության անդամ «Չաարատ Կապան» ընկերությունը՝ 576 հորիզոնականից միանգամից բարձրանալով 402 նիշով՝ խոշոր հազարյակի մեջ հանգրվանելով 174-րդ տեղը։

Նախորդ եռամսյակի համեմատությամբ, «Լիճքվազ» ընկերությունը 161-րդ տեղում է,  «Հեքսագոն Թի Էս»-ը 138-ից իջել է 212 հորիզոնական։

«Լեռնամետալուրգիայի ինստիտուտը» զբաղեցնում է 418-րդ տեղը, առաջին եռամսյակի համեմատությամբ այն իր դիրքերը բարելավել է 81 հորիզոնականով։

Ագարակի պղնձամոլիբդենային կոմբինատը 217-րդ տեղում է։ Կիսամյակի տվյալներով՝ ընկերությանը վճարել է 743 մլն 683  հազար դրամ։

Այսպիսով, Հայաստանի հանքագործների և մետալուրգների միության անդամ 11 ընկերությունները Պետական եկամուտների կոմիտեի պաշտոնական կայքում 26․07․ 2023թ․-ին հրապարակված տվյալների համաձայն, հաշվարկային տարվա հունվար-հունիս ամիսների ընթացքում, ընդհանուր հաշվով, պետական բյուջե են վճարել 47 մլդ 589 մլն 699 հազար դրամ։ 

Ըստ Պետական եկամուտների կոմիտեի՝ 1000 խոշոր հարկ վճարողները 2023 թ. հունվար-հունիս ամիսներին պետական բյուջե մուտք են արել ավելի քան 874 միլիարդ 522 միլիոն դրամ։