Հայաստանի հանքագործների և մետալուրգների միությունում անդամ կազմակերպությունների երկրաբանների մասնակցությամբ քննարկեց 11.08. 2022թ. ՀՀ կառավարության «Օգտակար հանածոների պաշարների շարժի վերաբերյալ տարեկան հաշվետվության ներկայացման կարգը, հաշվետվությունների ձևերը և լրացման ուղեցույցները սահմանելու մասին» N1268-Ն որոշման կիրարկման հարցը։
![](https://armhanq.com/wp-content/uploads/2023/02/image-11-1024x768.png)
Ներկայացված որոշումը հանքարդյունաբերողներին լուրջ ֆինանսական և վարչարարական հարցերի առաջ է կանգնեցրել։ Ոլորտի այլ խնդիրների շարքում այս մասին դեռևս նոյեմբերի 3-ին ՏԿԵ նախարար Գնել Սանոսյանի հետ հանդիպման ժամանակ ահազանգել էին միության անդամ ընդերքօգտագործող կազմակերպությունները։
![](https://armhanq.com/wp-content/uploads/2023/02/image-12-1024x768.png)
Բուռն քննարկման ընթացքում հնչեցին կարծիքներ, մասնագիտական դիտարկումներ, ընդգծվեցին որոշման անմիջական անբարենպաստ ազդեցությունը հանքարդյունաբերող ընկերությունների վրա։
Այս համատեքսում ընկերությունների ներկայացուցիչները եկան ընդհանուր եզրահանգման՝ առ այն, որ սուղ ժամկետներում պահանջվող բազմածավալ և աշխատատար, ինչպես նաև մեծ ֆինանսներ ենթադրող նմանատիպ իրավական որոշման կիրարկումը հավելյալ բեռ է ընկերությունների բնականոն գործունեության վրա և դրանց ոչ պատշաճ իրականացումը կարող է հանգեցնել ընդհուպ մինչև հանքարդյունաբերող ընկերությունների ընդերքօգտագործման իրավունքի դադերացման։ Առանց այն էլ Հայաստանում հանքարդյունաբերությունը օրհասական վիճակում է, և ցուցանիշները գահավիժում են դրամի արտարժույթի տատանման պատճառով։
![](https://armhanq.com/wp-content/uploads/2023/02/image-13-1024x768.png)
Աշխատանքային խումբը որոշում կայացրեց մեկ անգամ ևս գրավոր դիմել լիազոր մարմինին ՝ ակնկալելով վերջինիս կողմից ընդունելի համարել հարցի շուրջ ոլորտի մասնագետների տեսակետները և համապարփակ լուծում պահանջող խնդիրը լուծել երկուստեք փոխհամաձայնությամբ։
Քննարկմանը մասնակցում էին Զանգեզուրի պղնձամոլիբդենային կոմբինատ ՓԲԸ-ի ներկայացուցիչ Սերգեյ Աբրահամյանը, Ախթալայի ԼԿՀ-ից՝ Դավիթ Աբգարյանը և Խորեն Հարությունյանը, Մեղրաձորի Գոլդ ՍՊԸ-ի երկրաբան Գրիգոր Մուխսի-Հովեյանը, Չաարարտ ՓԲԸ-ից Արա Բարսեղյանը, Գեոպրոմայնինգ Գոլդ ՍՊԸ-ից Մակիչ Մկրտչյան, Թեղուտ ՓԲԸ-ից Հրանտ Հախվերդյանը։
![](https://armhanq.com/wp-content/uploads/2023/02/image-14-1024x768.png)
Հարկ է նշել, որ ՏԿԵ նախարարի առաջարկով նոյեմբերի 3-ին պայմանավորվածություն էր ձեռք բերվել պարբերաբար հանդիպել և քննարկել ոլորտի առաջ ծառացած հրատապ լուծում պահանջող խնդիրները, որոնք բազմաթիվ են ու տարաբնույթ։