Armhanq.com ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅԱՆ
Չինաստանի Ցինհուա համալսարանի գիտնականներին հաջողվել է վերականգնել անդամալույծ մարդու շարժողական որոշ գործառույթներ՝ օգտագործելով Neural Electronic Opportunity (NEO) կոչվող նեյրոիմպլանտը: Այդ մասին հայտնում է gadgettendency-ն։
Չինացի տղամարդն ավտովթարի հետևանքով ստացած ողնուղեղի վնասվածքի պատճառով հետո 14 տարի չի կարողացել կիրառել ձեռքերն ու ոտքերը։ Չիպը տեղադրվել է անցած աշնանը, և այժմ, մի քանի ամիս մարզվելուց հետո, նա կարողացել է վերցնել ջրի շիշը։ Գիտնականները հայտնել են, որ նա այժմ կարող է ինքնուրույն ուտել և խմել, և NEO ալգորիթմների հետագա վերականգնման և կատարելագործման արդյունքում նա կկարողանա վերականգնել բազմաթիվ տարբեր շարժումներ կատարելու ունակությունը։
Օրերս Իլոն Մասկի Neuralink ընկերությունը հայտարարել էր, որ առաջին անգամ մարդու գլխուղեղում իմպլանտ է տեղադրել։ Մասկը նշել էր, որ բուժառուն վերականգնման փուլում է, սակայն այլ մանրամասները չէր հայտնել։
Չինական իմպլանտն ավելի քիչ ինվազիվ և անվտանգ է, քան Neuralink-ի լուծումը, ասում են դրա ստեղծողները: Կոմպակտ չիպը, որը մոտ երկու կոպեկի չափի է, ուղղակիորեն չի տեղադրվում ուղեղի նյարդային հյուսվածքի մեջ, այն տեղադրված է ուղեղի և գանգի միջև ընկած էպիդուրալ տարածության մեջ: Այն չունի մարտկոց. իմպլանտը լիցքավորվում է հեռակառավարմամբ՝ փոքր հեռահարության անլար ցանցից՝ բարձր հաճախականության ալեհավաքի միջոցով:
Իմպլանտն ընդունում է նյարդային ազդանշանները և դրանք անլար ուղարկում արտաքին ընդունիչին, որը կցված է գլխի մաշկին: Այնուհետև ազդանշանները մշակվում և փոխանցվում կրելի ձեռնոցանման սարքին, որով մարդը կարող է տարբեր առարկաներ վերցնել:
Սա առաջին դեպքն է Չինաստանում, երբ իմպլանտը տեղադրվում է մարդու գլխուղեղում, մինչ այդ փորձարկումներն արվել են կենդանիների վրա։ NEO համակարգը մշակվել է 10 տարվա ընթացքում, իսկ անցյալ տարվա աշնանը գիտնականներն առաջին անգամ թույլտվություն են ստացել մարդու վրա փորձեր անցկացնելու համար: Առջևում դեռ շատ հետազոտություններ կան, նախքան իմպլանտը լայն կիրառման համար հաստատում կստանա:
