Առաջինը՝ «բրեքսիթից» հետո. Մեծ Բրիտանիայում սկսվել են համընդհանուր ընտրությունները

Անգլիայի, Շոտլանդիայի, Ուելսի եւ Հյուսիսային Իռլանդիայի 650 ընտրական օկրուգներում հինգշաբթի առավոտյան բացվել են ընտրատեղամասերը։ Սրանք առաջին համընդհանուր ընտրություններն են Մեծ Բրիտանիայում Եվրամիությունից երկրի դուրս գալուց հետո, տեղեկացրել է Euronews-ը։

Ընտրատեղամասերը աշխատանքն սկսել են տեղի ժամանակով ժամը 7-ին։

Քվեարկությունը կտեւի մինչեւ ժամը 22.00-ն, ինչից հետո կհրապարակվեն առաջին արդյունքները՝ հիմնված ընտրողների հարցումների վրա։

Արդյունքները կամփոփվեն գիշերը, եւ ինչպես սպասվում է, ընտրական օկրուգների մեծ մասը կհայտարարի իր հաղթող թեկնածուներին վաղ առավոտյան։

Սա առաջին քվեարկությունն է այն բանից հետո, երբ ընտրական օկրուգների սահմանները վերաձեւվել են 2023թ.։ Այս վերանայման արդյունքում Անգլիան ստացել է տասը տեղ, Շոտլանդիան եւ Ուելսը կորցրել են երկու եւ ութ տեղ համապատասխանաբար։

Սրանք նաեւ առաջին համընդհանուր ընտրություններն են, երբ ընտրողները պետք է իրենց հետ ունենան անձը հաստատող փաստաթուղթ լուսանկարով, որպեսզի քվեարկելու հնարավորություն ունենան։