Հիմնանորոգվում է Գավառ քաղաքի Պետրովի փողոցը

ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում ընթանում են Գավառ քաղաքի Պետրովի փողոցի հիմնանորոգման աշխատանքները։

Ինչպես տեղեկացրին Գավառի համայնքապետարանի աշխատակազմից, Պետրովի փողոցի հիմնանորոգման ծրագրի պայմանագրային արժեքը կազմում է 229 միլիոն դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Գավառի համայնքապետարանը։ 

Ծրագրով նախատեսվում է Պետրովի փողոցի երթևեկելի մասի ասֆալտապատում՝ 1231 մետր երկարությամբ և 8538 քմ մակերեսով, մայթերի սալիկապատում՝ 2119 քմ մակերեսով, 1374 գծամետր երկարությամբ մայթերի բազալտե եզրաքարերի, 320 գծամետր երկարության ջրահեռացման վաքերի տեղադրում, 325 գծամետր երկարության ջրահեռացման ներքին ցանցի և 156 գծամետր երկարության գաբիոնային հենապատի կառուցում։ 

Ներկայում ընթանում են ջրահեռացման վաքերի և մայթերի եզրաքարերի տեղադրման աշխատանքներ։ Կատարվել է նաև ճանապարհի երթևեկելի մասի հին ծածկի հեռացում։

Շինարարական աշխատանքներ, որոնք իրականացնում է  «Գավառի ՃՇՇ» ԲԲԸ-ն, նախատեսված է ավարտել այս տարվա ընթացքում։