Հայ-ֆրանսիական պարի փառատոն՝ Գավառում

Գեղարքունիքի մարզի և ֆրանսիական Իզերի դեպարտամենտի միջև մշակութային գործակցությամբ Գավառ քաղաքում պարի փառատոն է անցկացվում: 14 խումբ ներկայանում է ժամանակակից պարերով: Արդեն 6 տարի հայ պատանիների հետ աշխատում են ֆրանսիական Հալե Էգայան պարախմբի մասնագետները: Համատեղ փորձում են ավանդական պարերին զուգահեռ զարգացնել նաև ժամանակակիցը: 

Ինչպես տեղեկացրեց Գեղարքունիքի մարզպետի աշխատակազմի ԿՄՍ վարչության պետ Կարեն Զազյանը, համույթի պարուսույցների այցերը տարեկան երեք անգամ են, որոնց ընթացքում եռօրյա մաստեր կլաս են անցկացվում ավելի քան 30 երիտասարդների հետ: Ամեն տարի ծրագրի շրջանակներում շուրջ 100 երեխա և երիտասարդ մասնակցում է ժամանակակից պարի աշխատարանների:

«Հայ ընկերներիցս մեկին հարցրի՝ ի՞նչ է քեզ համար այս գործակցությունը, պատասխանեցի՝ կարևորն այն չէ, որ դու հայ ես, ես՝ ֆրանսիացի, կարևորն այն է, որ երկուսս էլ պարող ենք: Պարի փառատոնը միջոց է համախմբվելու ոչ թե «Ես սիրում եմ հայերին… ես սիրում եմ ֆրանսիացիներին…» մակարդակում, այլև մշակութային երկխոսությամբ, գիտելիքներ փոխանակելով»,- նշել է Լիոնի պարախմբի ղեկավար Բրունո Միեշոն։

Ժամանակակից պարերի դասավանդման ծրագրում ընդգրկված են մարզի արվեստի դպրոցների պարախմբերը և ֆրանսերենի ուսուցման խմբակների սաները: Փառատոնին նրանց են միացել պարողներ նաև Սյունիքի մարզից: Պարախմբերից շատերը սիրողական են և ձևավորվել են մշակութային նախաձեռնության շրջանակում: Միջոցառման մասնակիցները բացահայտում են ոչ միայն այլ ազգերի, այլև Հայաստանի տարբեր մարզերի պարի ավանդույթները: 

Երկօրյա փառատոնի բոլոր մասնակիցները ստացել են հավաստագրեր, իսկ լավագույն երկու պարախմբի խրախուսել  է Գեղարքունիքի մարզպետի աշխատակազմն ու Գավառի համայքնապետարանը: