Պատրաստակամ ենք նման առիթներն արդյունավետ օգտագործել․ ԶՊՄԿ-ն՝ երկրաբանական թեզի պաշտպանության ժյուրիի կազմում

Զանգեզուրի պղնձամոլիբդենային կոմբինատն ընդգրկվել է Երկրաբանության ինստիտուտում կայացած երկրաբանության ամբիոնի մագիստրոսների թեզի պաշտպանության ժյուրիի կազմում։ Այդ մասին տեղեկացնում է ընկերության՝ Ֆեյսբուքի պաշտոնական կայքը։

Տարածած հաղորդագրության մեջ նշված է․

«Երկրաբանությունը հանքարդյունաբերության հիմքն է, իսկ հանքարդյունաբերությունը ճշգրիտ գիտությունների վրա հենվող բարձր տեխնոլոգիական ճյուղ է։ Գիտության զարգացումը մեր ոլորտի համար գործնական լրջագույն նշանակություն ունի։ Հատկապես երկրաբանական գիտությունների հանդեպ երիտասարդության շրջանում հետաքրքրության ավելացումը՝ ոլորտի զարգացման գրավականն է։ Անցյալ ամիս ԶՊՄԿ-ում հյուրընկալեցինք ոլորտի գիտնականներին՝ այդ թվում՝ ՀՀ ԳԱԱ Երկրաբանության ինստիտուտի պատվիրակությունը, քննարկվեցին հետագա համագործակցության հնարավորությունները։

Երեկ Երկրաբանության ինստիտուտում տեղի ունեցավ երկրաբանության ամբիոնի մագիստրոսների թեզի պաշտպանությունը։ Ժյուրիում ընդգրկված էր նաև ԶՊՄԿ տեխնիկական տնօրեն Արման Վարդանյանը, ժյուրին նախագահում էր Լիդիան Արմենիա ընկերության տնօրենը, ընդգրված էին ոլորտի հեղինակավոր մասնագետները։

Այսօր առավել քան երբևէ ոլորտի ընկերությունների և ակադեմիական շրջանակների, ոլորտի իրական մասնագետների միջև սերտ գործակցությունը կարևոր է ոչ միայն ոլորտի, այլև տնտեսության զարգացման համար և ԶՊՄԿ-ն պատրաստակամ է նման ֆորմատի գործակցության առիթները առավելագույնս արդյունավետ օգտագործել»։