Իրանը հայտարարել է՝ վճռական պատասխան կտա իր դեմ ցանկացած հնարավոր հարձակման

Իրանը վճռական պատասխան կտա երկրի դեմ ցանկացած հարձակման։  Այդ մասին հայտնել է ՄԱԿ-ում Իրանի մշտական ներկայացուցիչը։

Լրագրողների հետ զրույցում Ամիր Սայիդ Իրավանին նշել է, որ Իրանի  հիմնարար քաղաքականությունն է «խիստ արձագանք տալ թշնամիներին, եթե նրանք թիրախավորեն երկիրը, դրա շահերը կամ քաղաքացիներին»։ Նա նաև հերքել է այն լուրերը, թե ԱՄՆ-ի և Իրանի միջև վերջին երկու օրերին հաղորդագրությունների փոխանակում է տեղի ունեցել միջնորդների միջոցով։

«Նման հաղորդագրություններ չեն փոխանակվել», – Իրավանիի խոսքերն է մեջբերում IRNA գործակալությունը։

ԶԼՄ-ներում տեղեկություններ էին տարածվել, թե Հորդանանում ամերիկյան ռազմակայանի վրա հունվարի 28-ին տեղի ունեցած հարձակումից հետո Վաշինգտոնը Թեհրանին հայտնել էր, որ լայնածավալ պատերազմ չի ցանկանում, սակայն նման սցենարի դեպքում ԱՄՆ-ն քայլեր կանի։ Իրանն էլ, ըստ հրապարակումների, իբրև, պատասխանել էր, թե իր տարածի վրա ցանկացած հարձակում կարմիր գիծ է և կարժանանա համապատասխան արձագանքի։

Այս լուրերը չեն հաստատել ո՛չ Թեհրանում, ո՛չ Վաշինգտոնում։

Հունվարի 28-ին Հորդանանում գտնվող ԱՄՆ ռազմակայանի վրա անօդաչու թռչող սարքերով հարձակման հետևանքով 3 ամերիկացի զինծառայող է զոհվել, առնվազն 40-ը՝ վիրավորվել։ ԱՄՆ նախագահ Ջո Բայդենը հարձակման պատասխանատու է անվանել Իրանին՝ «հարվածները հասցնող խմբավորումներին զենք մատակարարելու համար»։ ՄԱԿ-ում Իրանի ներկայացուցչությունը հայտարարել է, որ Թեհրանն առնչություն չունի այդ հարձակմանը։

Ինչպես ավելի վաղ հաղորդել էր «Արմենպրես»-ը, Բայդենը հայտնել է, որ որոշել է՝ ինչպիսին է լինելու ԱՄՆ-ի պատասխանը Հորդանանում ամերիկյան ռազմակայանի վրա հարձակմանը։ Սպիտակ տան ղեկավարը խոստացել էր, որ պատասխանը լինելու է «շատ լուրջ»։ Նա նաև հավելել էր, որ ԱՄՆ-ին Մերձավոր Արևելքում մեծ պատերազմ հարկավոր չէ։