Մարդանման ռոբոտը տան գործերը կանի ձեր փոխարեն. Tesla Optimus

Tesla ընկերությունը ներկայացրել է նոր տեսանյութ, որը ցուցադրում է իր մարդանման Optimus ռոբոտի կարողությունները՝ կատարելու տնային գործեր: Սոցիալական X ցանցում հրապարակված տեսանյութը ցույց է տալիս, թե ինչպես է ռոբոտը հաղթահարում առօրյա խնդիրները՝ բացելով տնային ռութին աշխատանքների ավտոմատացման հեռանկարներ:

Ի՞նչ կարող է անել Optimus-ը

Տեսանյութում Optimus-ը վստահորեն կատարում է բազմազան առաջադրանքներ՝ մաքրում է սենյակը, լվանում ամանները, արդուկում է հագուստը, պատրաստում է սնունդ և տեսակավորում է աղբը: Այս գործողությունները ցույց են տալիս ռոբոտի ներուժը որպես ունիվերսալ օգնական, որն ընդունակ է ստանձնելու տնային պարտականությունների լայն շրջանակ: Նման հնարավորությունները Optimus-ը դարձնում են գրավիչ տնային օգտագործման համար՝ ազատելով մարդկանց միապաղաղ աշխատանքից:

Ուսուցման նորարարական մոտեցում

Optimus-ի զարգացման նոր փուլի առանցքային առանձնահատկությունը նրա ուսուցման մեթոդն է: Ռոբոտը յուրացրել է ցուցադրված առաջադրանքները միասնական նեյրոնային ցանցի շնորհիվ, որը վերլուծել է մարդկանց կողմից նմանատիպ գործողություններ կատարող տեսանյութեր: Այս մոտեցումը զգալիորեն արագացրել է ուսուցման գործընթացը՝ շրջանցելով ավանդական ծրագրավորման բարդ և ժամանակատար մեթոդները: Ապագայում Tesla-ն պլանավորում է զարգացնել այս տեխնոլոգիան՝ ռոբոտին սովորեցնելով ինտերնետից ստացված տեսանյութերի հիման վրա, ներառյալ տարբեր անկյուններից նկարահանված կադրերը:

Նախագծի պատմություն և հեռանկարներ

Optimus-ը, որը նաև հայտնի է որպես Tesla Bot, առաջին անգամ ներկայացվել է 2021 թվականի օգոստոսին «Արհեստական բանականության օր» միջոցառման ժամանակ, իսկ առաջին նախատիպը ցուցադրվել է 2022 թվականին: Tesla-ի գլխավոր տնօրեն Իլոն Մասկը կարծում է, որ Optimus-ը կարող է դառնալ ավելի կարևոր նախագիծ, քան ընկերության ավտոմեքենաների բիզնեսը: Ռոբոտը մշակվում է որպես ունիվերսալ օգնական՝ վտանգավոր, կրկնվող կամ ձանձրալի առաջադրանքներ կատարելու համար: 2025 թվականին Tesla-ն պլանավորում է սկսել Optimus-ի օգտագործումը իր էլեկտրամեքենաների արտադրության գործարաններում, իսկ 2026 թվականին՝ գործարկել վաճառքը արտաքին հաճախորդների համար:

Տեխնիկական բնութագրեր

Optimus-ն ունի մարդանման ձև, մոտ 173 սմ հասակ և 57 կգ քաշ: Այն հագեցած է 40 էլեկտրամեխանիկական շարժիչներով, ներառյալ 12-ը ձեռքերում և 12-ը ոտքերում, ինչը ապահովում է շարժումների բարձր ճշգրտություն: Արտադրական մոդելների ձեռքերն ունեն 22 աստիճան ազատություն, ինչը թույլ է տալիս կատարել բարդ առաջադրանքներ, ինչպիսիք են առարկաների տեսակավորումը կամ նույնիսկ դաշնամուր նվագելը: Ներկառուցված սենսորները և Tesla-ի ավտոմեքենաների ավտոպիլոտի տեխնոլոգիաներից փոխառված արհեստական բանականության համակարգը ռոբոտին հնարավորություն են տալիս կողմնորոշվել տարածության մեջ և փոխգործակցել մարդկանց հետ:

Մարտահրավերներ և հեռանկարներ

Չնայած տպավորիչ ցուցադրություններին՝ փորձագետները նշում են, որ Optimus-ը դեռևս գտնվում է զարգացման վաղ փուլում: Նախորդ ցուցադրություններում որոշ առաջադրանքներ կատարվել են հեռակառավարման միջոցով, ինչը քննադատության է արժանացել թափանցիկության պակասի համար: Այնուամենայնիվ, նեյրոնային ցանցերի միջոցով առաջադրանքների ինքնավար կատարմանն անցումը զգալի առաջընթաց է: Tesla-ն շարունակում է կատարելագործել ռոլոտը, որպեսզի այն կարողանա աշխատել բարդ պայմաններում և անվտանգ փոխգործակցել մարդկանց հետ