Ծովինարում ոռոգման ջրատարի արտաքին ու ներքին ցանց է կառուցվել

Գեղարքունիքի մարզի Մարտունի համայնքի Ծովինար գյուղում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում ոռոգման ջրատարի արտաքին ու ներքին ցանց է կառուցվել։

Ծովինարի ոռոգման ջրատարի կառուցման ծրագրի պայմանագրային արժեքը կազմում է 198 միլիոն  750 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Մարտունու համայնքապետարանը։ 

Ինչպես փոխանցեցին Մարտունու համայնքապետարանից, ծրագրով նախատեսված է Ծովինարի ոռոգման ջրատարի արտաքին ու ներքին ցանցի կառուցում՝ 6010 մետր երկարությամբ, տարբեր տրամաչափերի երկաթբետոնե կիսախողովակներով։  

Ջրատարի արտաքին ցանցը կազմում է 1 կիլոմետր 300 մետր, ներքին ցանցը՝ 4 կիլոմետր  700 մետր, որը կառուցվել է  բնակավայրի ներսում, տարբեր թաղամասերում։ 

Շինարարական աշխատանքներն արդեն գտնվում են ավարտական փուլում։

Ծրագրի իրականացման արդյունքում արդեն շուրջ 350 հեկտար տարածքում ոռոգման ջուրն անկորուստ ու ժամանակին մատակարարվում է Ծովինար գյուղի 250 տնտեսություններին։