$6 մլրդ՝ NVIDIA-ի 100 000 արագագուցիչ գնելու համար

Ամերիկացի ձեռնարկատեր Իլոն Մասկին պատկանող xAI ստարտափը 6 մլրդ դոլարի ներդրում է ներգրավել, որը կուղղվի արհեստական բանականության (ԱԲ) սուպերհամակարգչի հաշվողական հզորությունն ընդլայնելու նպատակով NVIDIA ընկերության արտադրության արագացուցիչներ ձեռք բերելու համար, հայտնում է CNBC-ն։

xAI-ն այս տարվա սեպտեմբերի սկզբին գործարկել է Colossus AI կլաստերը՝ 100 հազար NVIDIA H100 արագացուցիչներով։ Պլատֆորմն օգտագործում է Supermicro սերվերներ, All-Flash պահեստավորման հանգույցներ, SuperNIC ադապտերներ և հեղուկ հովացման համակարգեր: Գերհամակարգիչը գտնվում է տվյալների հսկայական կենտրոնում՝ Մեմֆիսի (Թենեսի նահանգ) մոտակայքում:

Ներգրավվող 6 միլիարդ դոլարից 5-ը ստարտափը կստանա Մերձավոր Արևելքի սուվերեն հիմնադրամներից, ևս 1 մլրդ դոլարը՝ այլ ներդրողներից, որոնց անունները չեն բացահայտվում: Միևնույն ժամանակ, ստարտափի շուկայական արժեքը կհասնի 50 միլիարդ դոլարի։ The Financial Times-ը ևս տեղեկացնում է, որ xAI-ը լրացուցիչ միջոցներ կստանա զարգացման համար։ Ըստ թերթի՝ խոսքը $5 մլրդ-ի մասին է, իսկ ստարտափի կապիտալիզացիան $45 մլրդ է։

Նախկինում Մասկը խոսել էր Colossus-ի աշխատանքը կրկնապատկելու իր մտադրության մասին և ասել, որ դրա համար նախատեսվում է գնել մոտ 100,000 հատ ԱԲ արագացուցիչ, այդ թվում՝ 50,000 հատ NVIDIA H200։ Ըստ երևույթին, ստարտափը ներգրավվող միջոցները կօգտագործի նաև NVIDIA-ի այլ արտադրանքներ գնելու համար, ներառյալ Spectrum-X SN5600 անջատիչները և BlueField-3-ի վրա հիմնված ցանցային քարտերը:

Ընդորում, Մեմֆիսի բնակիչները դժգոհություն են հայտնում xAI ԱԲ համալիրի զարգացման կապակցությամբ։ Ակտիվիստները ստարտափին մեղադրում են նրանում, որ տվյալների կենտրոնի տարածքում օգտագործվող գեներատորները վատթարացնում են օդի որակը շրջանում։