Հայաստանում աճում է միջազգային բեռնափոխադրումների պահանջարկը

2024թ. 3-րդ եռամսյակում ATI.SU բեռնափոխադրումների բորսայում տեղաբաշխված այլ երկրներից Հայաստան բեռների առաքման հայտերի քանակը  նախորդ տարվա նույն ժամանակահատվածի համեմատ աճել է 20% – ով, իսկ նախորդ եռամսյակի համեմատ ՝ 7% – ով: Այդ մասին հաղորդում է բեռնափոխադրումների ATI.SU միջազգային բորսան:

Թրենդը որոշում են Ռուսաստանից բեռնափոխադրումները. այս ուղղությամբ հայտերի քանակը տարեկան կտրվածքով աճել է 23% – ով, իսկ երկրորդ եռամսյակի համեմատ՝ 6% – ով: Ավելացել է նաև Բելառուսից և Ղազախստանից բեռնափոխադրումների պահանջարկը։

Ընդ որում, հաշվետու ժամանակահատվածում Հայաստանից այլ երկրներ բեռների առաքման հայտերի քանակն աճել է 11%- ով, իսկ երկրորդ եռամսյակի համեմատ ՝ միանգամից 62% – ով։ Հայտերի բացարձակ քանակով առաջատարը Ռուսաստանն է. դեպի ՌԴ արտահանման բեռնափոխադրումների պահանջարկն աճել է տարեկան 8% – ով և երկրորդ եռամսյակի համեմատ ՝ 59% – ով։ Աճում է նաև դեպի Վրաստան, Բելառուս և Ղազախստան փոխադրումների նկատմամբ հետաքրքրությունը։

Շուկայի աշխուժացումն օրինաչափորեն հանգեցրել է արտահանման ուղղություններով ավտոմոբիլային բեռնափոխադրումների տոկոսադրույքների աճին: Միջին հաշվով, բեռի առաքման գինը մեկ տարվա ընթացքում աճել է 18% – ով:

<Բեռնափոխադրումների շուկայի վիճակագրությունն արտացոլում է Հայաստանի արտաքին առևտրի միտումները: Այսպես, ՀՀ վիճակագրական կոմիտեի վերջին տվյալներով, 2024 թվականի 8 ամիսների ընթացքում արտաքին առևտրաշրջանառությունն աճել է 79,6 տոկոսով, ընդ որում,  արտահանումն աճել է 2,1 անգամ։ Քանի որ երկրում բեռնափոխադրումների շուրջ 80 տոկոսը բաժին է ընկնում ավտոմոբիլային տրանսպորտին, ապա միջազգային համագործակցության ակտիվացումը խթան է դարձել ավտոմոբիլային բեռնափոխադրումների աճի համար”, – նշել է Հայաստանում “Բեռնափոխադրումների ATI.SU բորսայի” ներկայացուցչության տնօրեն Սերգեյ Մկրտչյանը:

Միևնույն ժամանակ, նա մատնանշել է աճի ևս մեկ գործոն ՝ սեզոնայինը: Մկրտչյանի խոսքով՝ ամառ-աշուն ժամանակահատվածում Ռազմավիրական ճանապարհով բեռնատարների երթևեկությանը եղանակային պայմանները չեն խանգարում: Մասնավորապես, այդ երթուղով է անցնում բեռների մեծ մասը Հայաստանի և նրա խոշորագույն արտաքին առևտրային գործընկեր Ռուսաստանի միջև։ Մինչև 2025 թվականի վերջը նախատեսվում է ավարտել Երևան – Թբիլիսի-Վլադիկավկազ ռազմավարական ավտոմայրուղու նոր հատվածի շինարարությունը, և այդ ժամանակ, ինչպես նշել է Բորսայի ղեկավարը, սեզոնային գործոնն այդքան նշանակալի չի լինի ավտոմոբիլային բեռնափոխադրումների շուկայի համար։

Ըստ Հայաստանի վիճակագրական կոմիտեի տվյալների,  Հայաստանում բեռնափոխադրումների ծավալը 2024 թվականի հունվար-օգոստոսին կրճատվել է 13,1% – ով (նախորդ տարվա 3% աճի դիմաց) ՝ կազմելով 10 500.1 հազար տոննա։ Դրա 79,5% – ը կամ 8 344.2 հազար տոննան բաժին է ընկնում ավտոմոբիլային բեռնափոխադրումներին, որոնք տարեկան կտրվածքով կրճատվել են 8,5% – ով:

Էական նվազում է արձանագրվել երկաթուղային բեռնափոխադրումների գծով՝ 45%՝ մինչեւ 891.8 հազար տոննա։

Մայրուղային գազատարով մատակարարվել է 1 240.2 հազ.տոննա բնական գազ, ինչը 6.5% – ով ցածր է նախորդ տարվա նույն ժամանակահատվածի ցուցանիշից:

Աճ է արձանագրվել միայն օդային բեռնափոխադրումների գծով՝ 13,3% – ով ՝ մինչև 23,9 հազար տոննա։