Կառավարությունը կավելացնի ՏԻՄ դոտացիաների չափերը

Հայաստանում տեղական ինքնակառավարման մարմինների եկամուտները կհամապատասխանեցվեն դրանց ծախսերին։ Ազգային ժողովի տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի հանձնաժողովը դրական եզրակացություն է տվել Ֆինանսական համահարթեցման մասին օրենքում կառավարության ներկայացրած փոփոխություններին:

Ինչպես իր ելույթում նշել է ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը, գործող օրենքն ընդունվել է 2016 թվականին: Դրա անկյունաքարային դրույթներից մեկը վերաբերում էր դոտացիոն հիմնադրամների գումարներին, որոնք, ըստ օրենսդրության, հետագա տարիներին պետք է լինեն ոչ պակաս, քան 2016 թվականին։ Նշված տարվանից ավել ստացված ողջ գումարն ուղղվել է տեղական ինքնակառավարման մարմինների բյուջեներ: Սակայն, ինչպես ցույց է տվել ժամանակը, այդ պահանջն այլևս չի համապատասխանում ժամանակի պահանջներին, քանի որ համայնքները միմյանցից տարբերվում են աշխարհագրորեն, բնակչության թվով և տարածքով: Այժմ առաջարկվում է համայնքների եկամուտների համահարթեցման գործընթաց իրականացնել՝ հաշվի առնելով դրանց ծախսային կարիքները ։ Տերտերյանը նշել է, որ օրենքի անցումային դրույթների պահանջները երեք անգամ երկարաձգվել են, որոնք այժմ կբացառվեն: Օրինագծում իրենց արտացոլումն են գտել նաև մի շարք նոր դրույթներ։ Մասնավորապես, պետությունը մինչև 3500 բնակիչ ունեցող համայնքների դոտացիոն հիմնադրամներին կուղղի 50 մլն դրամ։

Սահմանամերձ բնակավայրերից յուրաքանչյուրին կհատկացվի լրացուցիչ 5 մլն դրամ։ Կավելանա նաև մարզկենտրոնից և Երևանից համայնքների հեռավորության գործակիցը, ինչը նույնպես կազդի սուբսիդիաների չափի ավելացման վրա։ Տերտերյանը հաղորդել է, որ փոխվել են նաև բնակավայրերի բարձրադիր գործակիցները ։