Armhanq.com ՀԱՅԱՍՏԱՆԻ ՀԱՆՔԱՐԴՅՈՒՆԱԲԵՐՈՒԹՅԱՆ ԵՎ ՄԵՏԱԼՈՒՐԳԻԱՅԻ ԱՍՈՑԻԱՑԻԱ
Հարավային Հնդկաստանի Թամիլ Նադու նահանգի Մադուրայ Կամարաջ համալսարանի լաբորատորիայում հետազոտողները զգուշորեն հեռացնում են էմալը 2500-ամյա ատամից, հայտնում է BBC News-ը։
Այս ատամը պատկանել է Կիլադի հնագիտական համալիրի մոտ գտնվող Կոնդագայ հնագույն դամբարանում հայտնաբերված երկու արական գանգերից մեկին։ Գիտնականներն առաջին անգամ վերականգնել են այս մարդկանց դեմքերը՝ հասկանալու համար, թե ինչ տեսք են ունեցել տարածաշրջանի բնակիչները։
Հնագետները կարծում են, որ Կիլադիում գոյություն է ունեցել զարգացած քաղաքային քաղաքակրթություն, որը թվագրվում է մ.թ.ա. մոտ 580 թվականով։ Այս բացահայտումը մարտահրավեր է նետում այն ընդունված պատկերացմանը, որ հնդկական ուրբանիզացիայի ակունքները կապված են միայն հյուսիսի և Ինդոսի հովտի քաղաքակրթության հետ։ Կիլադիում մարդիկ ապրում էին աղյուսե տներում, գրել գիտեին, առևտուր էին անում ենթամայրցամաքի ներսում և նրա սահմաններից դուրս։ Հուղարկավորություններն ուղեկցվել են հացահատիկով և անոթներով սափորներով. նման գտածոներն արդեն մոտ հիսունն են։
Գիտնականներն այժմ ոսկորներից և արտեֆակտներից ԴՆԹ են դուրս բերում՝ հին բնակիչների ծագումն ու միգրացիաները հետագծելու համար։ Առաջին վերակառուցումները ցույց են տվել, այսպես կոչված, «հին հարավային հնդիկների» դիմագծերը, որոնց համարում են ենթամայրցամաքի առաջին բնակիչներից։ Սակայն դեմքերում հայտնաբերվում են նաև մերձավորարևելյան և ավստրոասիական ծագման հետքեր, ինչը վկայում է հնագույն վերաբնակեցումների և ժողովուրդների խառնուրդի մասին։
Գանգերի 3D սկանավորումներն ուղարկվել են Լիվերպուլի համալսարանին կից Face Lab, որտեղ մասնագետները մկաններ, մաշկ և գույն են ավելացրել՝ հիմնվելով Թամիլ Նադուի բնակիչների ժամանակակից մարդաբանական տվյալների վրա։ Հենց գունավորման՝ մաշկի, աչքերի և մազերի երանգի հարցն է բուռն քննարկումների տեղիք տվել հնդկական հասարակության մեջ՝ կրկին սրելով հյուսիս-հարավ թեման և «առաջին հնդիկների» ծագման շուրջ վեճերը։
Սակայն հետազոտության ղեկավար, պրոֆեսոր Կումարեսանը վստահ է. գլխավոր ուղերձն այն է, որ Հնդկաստանի անցյալը շատ ավելի բազմազան է, քան ընդունված է կարծել։ Եվ դրա ապացույցը ԴՆԹ-ի մեջ է։
