Armhanq.com ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅԱՆ
«Սիթի Օֆ Սմայլ» հիմնադրամը 2023 թվականին աջակցել է 244 շահառուի` փակելով բուժման ամբողջական ծախսերը: Նրանցից 111-ը հիմնադրամ դիմել են ընթացիկ տարում: Շահառուներից 103-ը առողջացել և վերադարձել են տուն:
«Արմենպրես»-ի փոխանցմամբ՝ այս մասին ասաց «Սիթի Օֆ Սմայլ» հիմնադրամի տնօրեն Էսթեր Դեմիրճյանն՝ ամփոփելով հիմնադրամի 2023 թվականի կատարած աշխատանքը: Նա նշեց, որ հիմնադրամն, առհասարակ, քաղցկեղով հիվանդ փոքրիկների կողքին է 2018 թվականից՝ ֆինանսավորելով ընդհանուր 723 երեխայի բուժում, որոնցից 450-ն արդեն ավարտել են իրենց բուժումը:
Հիմնադրամի առաքելությունն այսօր կարևոր դեր ունի, քանի որ, ըստ տնօրենի՝ շատ-շատերը առանց հիմնադրամի աջակցության չէին կարողանա հոգալ բուժման ծախսերը: Նրա խոսքով՝ հիվանդների 70 տոկոսը գալիս են մարզերից և ունեն սոցիալական ծանր վիճակ:
«Մինչև այս պահը հիմնադրամն արդեն աջակցել է 723 երեխայի՝ բուժման նպատակով տրամադրելով 1 մլրդ 671 միլիոն 146 հազար 194 դրամ: 2023 թվականին «Սիթի Օֆ Սմայլ»-ն աջակցել է 244 շահառուների, որոնցից 111-ը հիմնադրամ են դիմել 2023 թվականի ընթացքում: Շահառուներից 103-ը առողջացել են և արդեն վերադարձել են տուն:
2023 թվականին հիմնադրամն իր շահառուներին տրամադրել է մոտ 71 տեսակի դեղամիջոցների ավելի քան 10 հազար 300 տուփ, հոգացել է նաև իր շահառուների 1518 տարբեր տեսակի հետազոտությունների իրականացումը: Որպեսզի խուսափեն վերջույթների ամպուտացիայից, հիմնադրամն իր երկու շահառուների համար ձեռք է բերել էնդոպրոթեզներ»,- նշեց Դեմիրճյանը:
Նա ընդգծեց, որ «Սիթի Օֆ Սմայլ» հիմնադրամի նախաձեռնությամբ և ֆինանսավորմամբ՝ Հայաստանում առաջին ու միակ մանկական պալիատիվ խնամքի կլինիկայում առ այսօր համապատասխան խնամք և բուժօգնություն է ստացել 23 երեխա:
2023 թվականի ընթացքում 9 բժիշկ և բուժաշխատող հիմնադրամի ջանքերով մասնակցել է ուռուցքաբանությանը և արյունաբանությանը վերաբերող հեղինակավոր գիտաժողովների՝ ԱՄՆ-ում, Եվրոպայում և Միջին Արևելքում: Հիմնադրամը շարունակում է ապահովել մանկական քաղցկեղի և արյան բուժում ստացող բոլոր երեխաների սնունդը. 2023 թվականին տրամադրվել է օրական 4-անգամյա սննդի 8895 փաթեթ:
«2022 թվականին բացված՝ քաղցկեղ ունեցող երեխաների և նրանց ընտանիքների անդամների համար նախատեսված հոգևոր վերականգնողական կենտրոնում մինչ օրս աջակցություն է ստացել 27 երեխա և երիտասարդ: Հիմնադրամի նախաձեռնությամբ Հայաստանում անցկացվել են տարածաշրջանային հանդիպումներ, գիտաժողովներ, որոնց մասնակցել են մի շարք հեղինակավոր կլինիկաներ և մասնագետներ, ինչը հնարավորություն է տվել ստեղծել նոր կապեր և համագործակցության նոր ուղիներ:
Հիմնադրամի համաֆինանսավորմամբ 2023 թվականի օգոստոսից ՀՀ-ում առաջին անգամ անցկացվեց ոսկրածուծի ալոգեն փոխպատվաստման աննախադեպ ծրագիրը՝ արյան չարորակ հիվանդությունների համար: Մինչ օրս փոխպատվաստում է իրականցվել 9 երեխայի համար»,- ընդգծեց նա:
Էսթեր Դեմիրճյանը նշեց, որ պարզապես անհնարին կլիներ հարյուրավոր երեխաների բուժումը, խնամքը և ապաքինումը՝ առանց պրոֆեսիոնալ և նվիրյալ մասնագետների ջանքերի, հազարավոր հոգատար նվիրատուների և տասնյակ հազարավոր բարի մարդկանց, ովքեր նվիրատվություն են անում հանգանակության արկղիկի միջոցով:
Մանկական քաղցկեղի և արյան հիվանդությունների կենտրոնի ղեկավար, ԵՊԲՀ մանկական ուռուցքաբանության և արյունաբանության ամբիոնի վարիչ, Իմունաուռուցքաբանության հետազոտական ինստիտուտի տնօրեն, պրոֆեսոր Գևորգ Թամամյանը նշեց, որ առանց «Սիթի Օֆ Սմայլ» հիմնադրամի աջակցության շատ դժվար կլիներ ունենալ այն զարգացումն ու առաջընթացը, ինչն այսօր գրանցվում է Հայաստանում:
«Վերջին 30 տարում, իմ կարծիքով, դժվար թե Հայաստանում լինի ոլորտ, որը նման աննախադեպ առաջընթաց ունենա, ինչը որ ունի մանկական ուռուցքաբանության և արյունաբանության բնագավառը: Դրա մասին են խոսում մեր գրանցած բուժելիության բարձր արդյունքները, մեր մասնագետների պահանջված լինելու փաստը և տարբեր երկրներից բուժման նպատակով հատուկ մեր երկիր ժամանողների թվաքանակի աճը»,- ասաց Թամամյանն՝ ընդգծելով, որ մեծ է նաև հիմնադրամի աջակցությունը՝ իրենց մասնագետների գիտելիքների և հնարավորությունների մեծացմանը նպաստելու գործում:
