Armhanq.com ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅԱՆ
Լեռնային Ղարաբաղ հումանիտար բեռ տեղափոխող բեռնատարները հագեցած են համապատասխան սառեցման համակարգերով, որոնք թույլ են տալիս պիտանելիության հետ կապված խնդիրները լուծել:
«Արմենպրես»-ի հետ զրույցում այսդ մասին ասել է Լեռնային Ղարաբաղում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը ընդգծելով, որ, հաշվի առնելով այն օրհասական իրավիճակը, որը այս պահին տիրում է Լեռնային Ղարաբաղում, իրենք բոլոր ջանքերը շարունակում են ներդնել ժամ առաջ այս ուղեբեռը տեղափոխելու նպատակով:
««Գրանդ Քենդի» ընկերության երկու բեռնատարներով քաղցրավենիք միացել է 8 օր այստեղ գտնվող 19 բեռնատարների շարասյանը, որը Հայաստանի կառավարությունը, որպես հումանիտար օգնություն, ցանկանում է տեղափոխել Լեռնային Ղարաբաղ:
Ողջունելի է, որ մասնավոր հատվածը միանում է Հայաստանի կառավարության այս հումանիտար նախաձեռնությանը, որը ի ցույց է դնում այն համընդհանուր մտահոգությունն ու անհանգստությունը, որը առկա է Լեռնային Ղարաբաղում հումանիտար ճգնաժամով պայմանավորված»,- ասել է Սարգսյանը:
Վարդան Սարգսյանն ընդգծել է՝ «Գրանդ Քենդի» ընկերության նախաձեռնությունն ուղղված է հիմնականում երեխաներին. Լեռնային Ղարաբաղում շրջափակման մեջ գտնվող մարդկանց շրջանում թերևս այս իրավիճակից ամենից շատ տուժում են երեխաները:
«Լեռնային Ղարաբաղում բնակվող երեխաները փաստացի այս պահին զրկված են ոչ միայն այս քաղցրավենիքից, այլ նաև ամենօրյա սննդից, էլ չենք խոսում բուժօգնության և կրթության իրավունքի մասին: Ցավով պետք է արձանագրենք, որ այս իրավիճակը նպաստում է նրան, որ երեխաները պարզապես զրկվեն անհոգ մանկությունից:
Ուստի, հույս ունենք, որ քաղցրավենիքներով ուղեբեռը մնացած բեռների հետ հնարավորինս շուտ կկարողանանք հասցնել Լեռնային Ղարաբաղ, որը գոնե մասամբ կմեղմի այն բարդ իրավիճակը, որին ներկայումս ականատես ենք լինում»,- ասաց նա:
Անդրադառնալով առհասարակ Լաչինի միջանցքում տիրող իրավիճակին՝ Վարդան Սարգսյանը նկատեց, որ իրավիճակը դեռևս մնում է նույնը, ջանքերը շարունակվում են օր առաջ հումանիտար բեռը տեղ հասցնելու գործընթացը հաջողությամբ ավարտելու ուղղությամբ:
