Հունիսի 14-ը Արյան դոնորի համաշխարհային օրն է

Հունիսի 14-ին՝ Արյան դոնորի համաշխարհային օրը Հայկական Կարմիր խաչի ընկերությունը (ՀԿԽԸ) կազմակերպում է արշավ՝ «Նվիրիր արյուն, նվիրիր պլազմա, նվիրիր կյանք. արա դա հաճախ» խորագրով: Արշավի նպատակն է խրախուսել արյան կամավոր դոնորությունը՝ հանրապետության արյան բանկը համալրելու նպատակով:

«Ժամը 9:00-ից 13:00-ը, բոլոր ցանկացողները կարող են արյուն հանձնել հանրապետության արյան կայաններում, որտեղ Հայկական Կարմիր խաչի կամավորները կուղղորդեն և կաջակցեն գործընթացի ամբողջ ընթացքում:

Հունիսի 14-ին ընդառաջ և նույն օրը Երևանում և ՀՀ մարզերում ՀԿԽԸ կամավորները հանրությանը կիրազեկեն, արյան դոնորության կանոնների (ով կարող է լինել դոնոր, ինչ անել արյուն հանձնելուց առաջ և հետո) և իմունիզացիայի կարևորության մասին:

Արշավն իրականացվում է ՀՀ Առողջապահության նախարարության, ՀՀ ԱՆ «Պրոֆեսոր Ռ.Հ.Յոլյանի անվան արյունաբանական կենտրոն» ՓԲԸ-ի, Հիվանդությունների վերահսկման և կանխարգելման ազգային կենտրոնի (ՀՎԿԱԿ) հետ համագործակցությամբ և Կարմիր խաչի միջազգային կոմիտեի, Ավստրիայի զարգացման գործակալության, Ավստրիական Կարմիր խաչի աջակցությամբ:

Գ․ Սունդուկյանի անվան ազգային ակադեմիական, Կ․ Ս․ Ստանիսլավսկու անվան պետական ռուսական դրամատիկական և Պատանի հանդիսատեսի թատրոնները անվճար տրամադրել են ներկայացման 400 հատ տոմս, որոնք Հայկական Կարմիր խաչի կամավորները կփոխանցեն բոլոր արյուն հանձնողներին։

Արյան կայանների հասցեները՝

«ՊՐՈՖԵՍՈՐ Ռ․Հ․ ՅՈԼՅԱՆԻ ԱՆՎԱՆ ԱՐՅՈՒՆԱԲԱՆԱԿԱՆ ԿԵՆՏՐՈՆ» ՓԲԸ, ք․ Երևան, Հրաչյա Ներսիսյան փող․, 7 շենք (Քանաքեռ-Զեյթուն վարչ․ շրջան)
«ԼՈՌՈՒ ՄԱՐԶԱՅԻՆ ԱՐՅԱՆ ՓՈԽՆԵՐԱՐԿՄԱՆ ԿԱՅԱՆ» ՓԲԸ, ք․ Վանաձոր, Նժդեհի 2/42
«ՀՐԱԶԴԱՆԻ ՄԱՐԶԱՅԻՆ ԱՐՅԱՆ ԲԱՆԿ» ՓԲԸ, ք․ Հրազդան, Մ․ Ղուկասյան փ․ 40

«ԱՐՄԱՎԻՐԻ ՄԱՐԶԱՅԻՆ ԱՐՅԱՆ ԲԱՆԿ» ՓԲԸ, ք․ Արմավիր, Մ․ Հեռացի փողոց, 10 շենք
«ՍՅՈՒՆԻՔԻ ՄԱՐԶԱՅԻՆ ԱՐՅԱՆ ՓՈԽՆԵՐԱՐԿՄԱՆ ԿԱՅԱՆ» ՓԲԸ, ք․ Գորիս, Օրբելյանների փ․ 5/2
«ԳՅՈՒՄՐՈՒ ԱՐՅԱՆ ՓՈԽՆԵՐԱՐԿՄԱՆ ԿԱՅԱՆ» ՓԲԸ, ք․ Գյումրի, Մազմանյան փ․ 3ա

Հայկական Կարմիր խաչի ընկերությունը (ՀԿԽԸ), հանդիսանալով Կարմիր խաչի և Կարմիր մահիկի միջազգային շարժման լիիրավ անդամ, առաջնորդվում է շարժման հիմնարար սկզբունքներով` Մարդասիրություն, Անկողմնակալություն, Չեզոքություն, Անկախություն, Կամավորություն, Եզակիություն, Համընդհանրություն։

Հանդիսանալով կառավարությանն աջակցող կառույց՝ մարդասիրական ոլորտում, ՀԿԽԸ-ն արդեն 103 տարի է գործունեություն է ծավալում հանրապետության ամբողջ տարածքում հետևյալ ռազմավարական ուղղություններով՝ աղետների կառավարում, բնակչության տեղաշարժ, սոցիալ – առողջապահություն, առաջին օգնություն, երիտասարդական, մարդասիրական արժեքների տարածում և այլն:

ՀԿԽԸ առաքելությունն է նվազեցնել բնակչության խոցելիությունը` մարդասիրության ուժի մոբիլիզացմամբ, նախապատրաստվել դիմակայելու այն իրավիճակներին, որոնք կարող են բնակչության խոցելիության պատճառ դառնալ, ցուցաբերել անհրաժեշտ օգնություն` սատարելով սոցիալ-տնտեսական ծանր պայմաններում գտնվող մարդկանց»,- ասված է ՀԿԽԸ տարածած հաղորդագրությունում։