Հնդկաստանում առնվազն 12 մարդ է զոհվել կայծակի հարվածներից

Հնդկաստանի արևելյան Օդիշա նահանգում կայծակի հարվածներից առնվազն 12 մարդ է զոհվել, ևս 14-ը տուժել են։ Այդ մասին հաղորդում է The Times of India պարբերականը։

Կայծակի հարվածները տեղի են ունեցել սեպտեմբերի 2-ին, երբ երկու ժամվա ընթացքում նահանգի տարածքում արձանագրվել է կայծակի առնվազն 61 000 հարված։

Հնդկաստանի օդերևութաբանական ծառայությունն ավելի վաղ նախազգուշացրել էր Բենգալյան ծոցում ցիկլոնների պատճառով երկրի արևելքում եղանակի վատթարացման և հորդառատ անձրևների մասին։ Եղանակային ծայրահեղ պայմաններն, ըստ կանխատեսումների, Օդիշայում կշարունակվեն մինչև սեպտեմբերի 7-ը։

Ըստ պաշտոնական տվյալների՝ 2022 թ.-ին Հնդկաստանում կայծակի հարվածներից զոհվել է 907 մարդ։