Գայանե Մարտիրոսյանի նկատմամբ սահմանված պատիժը պայմանականորեն չի կիրառվի․ նա դատարանի դահլիճից ազատ արձակվեց

Դատարանը Հայաստանի վարչապետի որդուն առևանգելու գործով մեղադրվող, 44-օրյա պատերազմում զոհված զինծառայող Ժորա Մարտիրոսյանի մորը՝ Գայանե Մարտիրոսյանին 4 տարվա ազատազրկման դատապարտելու որոշում է ընդունել․ միևնույն ժամանակ, դատարանը որոշում է կայացրել նշանակված պատիժը պայմանականորեն չկիրառել և սահմանել 1 տարի ժամկետով փորձաշրջան։ Գայանե Մարտիրոսյանի նկատմամբ կիրառված խափանման միջոց կալանքը փոխվել է,  նա ազատ է արձակվել դատական նիստերի դահլիճից։

Փորձաշրջանի ընթացքում Գայանե Մարտիրոսյանի վարքագծի նկատմամբ վերահսկողությունը դատարանը հանձնարարել է ՀՀ պրոբացիայի ծառայությանը։

Գայանե Մարտիրոսյանի վրա դատարանը պարտավորություն է սահմանել՝ առանց վերահսկողություն իրականացնող լիազոր մարմնի չլքել Հայաստանի տարածքը, իսկ բնակության վայրը փոխելու դեպքում սեղմ ժամկետում բնակության նոր վայրի մասին հայտնել վերահսկողություն իրականացնող իրավասու մարմնին։