Mercedes-Benz-ը կրճատել է շահույթը

Գերմանական ավտոարտադրող Mercedes-Benz Group AG-ն 2025 թվականի առաջին եռամսյակում իր զուտ շահույթը կրճատել է 1.7 անգամ, եկամուտը՝ 7%-ով: Երկու ցուցանիշներն էլ ավելի վատ են, քան շուկայական կանխատեսումները։

Հաշվետու եռամսյակում ընկերության զուտ շահույթը նվազել է մինչև 1.73 միլիարդ եվրո՝ նախորդ տարվա 3.03 միլիարդ եվրոյի համեմատ։ Եռամսյակային եկամուտը նվազել է մինչև 33.22 միլիարդ եվրո՝ նախորդ տարվա 35.9 միլիարդ եվրոյի համեմատ։

FactSet-ի կողմից հարցված վերլուծաբանները միջինում կանխատեսել էին Mercedes-ի զուտ շահույթը 2.03 միլիարդ եվրո՝ 35.01 միլիարդ եվրո եկամուտի դեպքում։

Ավտոմոբիլային գործառնությունների շահութաբերությունը նվազել է մինչև 7.3%՝ նախորդ տարվա 9%-ի համեմատ։

Մարդատար մեքենաներ արտադրող Mercedes-Benz Cars ընկերության եկամուտը վերջին եռամսյակում նվազել է 6%-ով՝ հասնելով 24.24 միլիարդ եվրոյի, մինչդեռ թեթև բեռնատարներ արտադրող Mercedes-Benz Vans ընկերության եկամուտը նվազել է 17%-ով՝ հասնելով 4.08 միլիարդ եվրոյի։ Mercedes-Benz Mobility ստորաբաժանման եկամուտը նվազել է 6%-ով՝ հասնելով 6.22 միլիարդ եվրոյի։

Ընկերության կողմից մարդատար ավտոմեքենաների վաճառքը առաջին եռամսյակում նվազել է 4%-ով՝ հասնելով 446.3 հազար միավորի։ Մասնավորապես, էլեկտրական մեքենաների վաճառքը նվազել է 14%-ով, թեթև բեռնատարներինը՝ 21%-ով։

Mercedes-Benz-ը նշել է, որ ԱՄՆ ներմուծման մաքսատուրքերի և այլ երկրների կողմից հնարավոր պատասխան միջոցառումների շուրջ բարձր անորոշության պատճառով ընկերությունը չի կարող հուսալի կանխատեսումներ տրամադրել ընթացիկ տարվա մնացած մասի համար։