Ավարտել են Երկրից դուրս բանականություն որոնելու նախագծերից մեկը

SETI (Search for Extraterrestrial Intelligence) նախագծի ամերիկացի հետազոտողներն ամփոփել են տիեզերական տվյալների մասշտաբային վերլուծության արդյունքները՝ փնտրելով տեխնոսիգնատուրաներ՝ Երկրից դուրս բանական կյանքի հնարավոր նշաններ: COSMIC համակարգը մշակել է գրեթե մեկ միլիոն օբյեկտների ազդանշաններ, բայց Երկրից դուրս բանականության հետքեր չեն հայտնաբերվել: Հետազոտության արդյունքները հրապարակվել են գիտական arXiv պորտալում:

Ինչպե՞ս է աշխատում COSMIC-ը

COSMIC (Commensal Open-Source Multimode Interferometer Cluster) ազդանշանների մշակման առաջատար համակարգ է, որը ինտեգրված է Karl G. Jansky Very Large Array (VLA) ռադիոտելեսկոպների հետ: Դրա ալգորիթմները իրական ժամանակում վերլուծում են տվյալները՝ փնտրելով նեղաշերտ ռադիոազդանշաններ, որոնք կարող են լինել արհեստական ծագման: Նման ազդանշանները պետք է համապատասխանեն մի շարք չափանիշների, ներառյալ հաճախականության փոփոխությունները Դոպլերի էֆեկտի պատճառով, որը առաջանում է ճառագայթման աղբյուրի շարժման ժամանակ:

«COSMIC-ը մշակվել է տեխնոսիգնատուրաների ավտոմատացված որոնման համար SETI-ի ամենամեծ փորձերից մեկում», – նշում են աշխատանքի հեղինակները:

Համակարգն արդեն վերլուծել է ավելի քան 950 հազար տիեզերական օբյեկտ, ինչը այս հետազոտությունը դարձնում է SETI-ի պատմության մեջ ամենամասշտաբայիններից մեկը:

Առաջին արդյունքները

Դիտարկումների փորձարկման դաշտերից մեկը դարձել է 511 աստղեր, որոնք ընտրվել են Gaia կատալոգի տվյալների հիման վրա: Վերլուծության ընթացքում COSMIC-ը չի հայտնաբերել արհեստական ազդանշանների նշաններ, սակայն հետազոտողները ընդգծում են, որ սա աշխատանքի միայն սկիզբն է: Ապագա հետազոտությունները կներառեն ավելի շատ օբյեկտներ, իսկ վերլուծության ալգորիթմները կկատարելագործվեն:

Չնայած Երկրից դուրս գործունեության ակնհայտ ապացույցների բացակայությանը, գիտնականները կարծում են, որ փորձը մեծ նշանակություն ունի:

«Մենք մշակել ենք տվյալների մշակման արդյունավետ համակարգ, որը կարող է վերլուծել տեղեկատվության հսկայական ծավալներ: Սա կարևոր է ժամանակակից ռադիոաստղագիտության և տիեզերքում բանական կյանքի հետագա որոնումների համար», – եզրակացրել են հետազոտության հեղինակները: