Քաջարանի «Գրքահոլիկները»՝ Վահանավանքում, «Մոլեգին հողմերի դարավանդի» քննարկմանը

Օրերս կայացավ «Գրքահոլիկներ» գրական ակումբի հերթական հանդիպումը, հաղորդում է Քաջարանի մշակույթի պալատի ֆեյսբուքյան էջը։

«Այս անգամ քննարկում էինք անգլիացի դասական գրող Էմիլի Բրոնթեի «Մոլեգին հողմերի դարավանդը» ստեղծագործությունը։ Քանի որ ստեղծագործությունը լի էր հրաշալի բնապատկերներով, որոշեցինք հավաքվել «Վահանավանք» վանական համալիրի գեղատեսիլ անկյունում։

Մինչև գրքի քննարկմանն անցնելը ակումբի մասնակիցները հնարավորություն ունեցան վայելելու ֆլեյտայի թովիչ հնչյունները, ինչն առավելագույնս նպաստեց գրքի ներաշխարհը թափանցելուն։

Խոսեցինք գրքում նկարագրված դարաշրջանի բարքերի, նիստուկացի, սովորույթների, ընտանեկան կապերի և արժեքների մասին։ Եվ իհարկե, զրույցի կենտրոնում սերն էր, կիրքը և դրա կործանարար հետևանքները։ Հանդիպման ավարտին ընտրեցինք հաջորդ ընթերցման գիրքը։

Ինչ խոսք, հանդիպումը բովանդակալից էր և էսթետիկ»,- նշված է տարածած հաղորդագրության մեջ։