Պակիստանում արգելվել է կարմիր ուղեգորգի գործածումը պաշտոնական միջոցառումներին

Պակիստանի վարչապետ Շահբազ Շարիֆն արգելել է պաշտոնական միջոցառումների ժամանակ կարմիր ուղեգորգի օգտագործումը։

Տեղական լրատվամիջոցները հաղորդում են, որ որոշումն ընդունվել է Պակիստանի առջև ծառացած լուրջ տնտեսական խնդիրների ֆոնին։

Կառավարությունը հայտարարություն է տարածել՝ պարզաբանելով, որ դիվանագիտական ​​միջոցառումների ժամանակ կարմիր ուղեգորգի կիրառումը սահմանափակվելու է բացառապես արարողակարգային նպատակներով։

Ավելի վաղ Շարիֆն ու նրա նախարարները  կամավոր որոշել էին հրաժարվել իրենց աշխատավարձերից և արտոնություններից։

Երկրի նախագահ Ասիֆ Ալի Զարդարին նույնպես որոշել է հրաժարվել աշխատավարձից։

Պաշտոնը ստանձնելուց մի քանի շաբաթ հետո Շարիֆը հայտարարել էր խնայողության կոշտ միջոցառումների մասին, որոնք ուղղված են պետական ​​ծախսերի կրճատմանը:

Միջոցառումները ներառում են շքեղ մեքենաների գնման արգելք, նախարարներից պահանջվում է ճանապարհորդել էկոնոմ դասով և վճարել իրենց կոմունալ վարձերը, ինչպես նաև կանգ չառնել հինգաստղանի հյուրանոցներում: